Për ditë e më shumë konsumatorët dhe ndërmarrjet po varen  nga teknologjia informative dhe  interneti. Lirisht mund të themi se, jeta dhe puna jonë nuk mund të paramendohen pa internet. Pra, biznesi dhe teknologjia janë partnerë të pandashëm dhe të ndërvarurë, të cilët ndihmojnë njëri tjetrin të optimizojnë përparësitë e tyre konkurruese.

Teknologjia informative dhe interneti kanë revolucionarizuar të gjitha aspektet dhe dinamikat e marketingut duke:

  • Rritur përfitimin e Konsumatorit përmes vlerësimit i nevojave të konsumatorëve online, përshtatjes dhe personalizimit të produkteve, mundësimit të mediave të reja të komunikimit interaktiv përmes kanaleve të shumëfishta në mes të biznesit dhe konsumatorit, krijimit të shërbimeve 24×7 për konsumatorët; ofrimit të informatave në kohë reale, ofrimit të opcioneve të reja të çmimeve dhe promovimit personal (Makarem, et al., 2009).
  • Zvogëluar koston e  vlerësimit të nevojat e konsumatorëve, shpërndarjes së informatës, prezantimit të kanaleve të ndryshme të blerjes dhe shitjes së produketeve/shërbimeve, procesimit të transakcionit, shërbimit të konsumatorëve dhe përmirëson kanalet e distribucionit, menaxhimit të stoqeve dhe shërbimeve dhe krijon efikasitet më të madh në zingjirin e vlerave.
  • Rritur të hyrat sepse bizneset mund t’ju qasen tregjeve globale dhe mund të kryejnë transakcionet online kur shesin produktet, informatat,  dhe reklamojnë.  Kjo ndikon në rritjes së bazës së konsumatorëve duke arritur tregje të reja,  ndërtimit të marrëdhënieve me konsumatorët dhe krijimit të bazës së konsumatorëve lojal të cilët janë më të prirur të shpenzojnë më shumë në të njëjtën biznes (Strauss, et al., 2003).

Me një fjalë, e-marketingu fuqizoj konsumatorin, mirëpo rritja e fuqisë së konsumatorit nuk ka ndikuar në zvogëlimin e atraktivitetit e e-biznesit apo e-marketingut siç ka theksuar Porter në (Kotler & Keller, 2006), përkundrazi afarizmi në internet ka marrë përmasa marramendëse për një periudhë shumë të shkurtër, ka bërë që afarizmi në internet të jetë edhe më atraktiv dhe të krijoj vlera të reja për konsumatorët.

Pra, interneti dhe sistemet kompjuterike të lidhura me të, kanë zgjeruar dhe përmirësuar funksionet e marketingut tradicional përmes programeve për menaxhimin e marrëdhënieve me konsumatorin (CRM), automatizimit të forcës shitëse, automatizimit të marketingut,  programeve për menaxhimin e punëtorëve dhe partnerëve.

Kësisoji është rritur mundësia dhe shpejtësia e shpërndarjes së informatës, ka krijuar mundësi konsumatorë të marrin pjesë në dizajnimin dhe zhvillimin e produkteve, ka rritur kthimin nga shitjet për produktet dhe shërbimet që mund të ri-prodhohen dhe dërgohen në mënyrë dixhitale/elektronike, meqërast kostoja për të ofruar shërbim për konsumatorin ose për të bërë ndonjë produkt të ri është vogël apo zero, mirëpo sic thotë Timmers (2000) dhe Urban (2004) është rritur vlera për konsumatorin dhe njëkohësisht konsumtorët janë ndërgjegjësuar.

Kësisoj, teknologjia informative ka vendosur konsumatorin në qendër dhe ka bërë një ndryshim fundamental të dinamikës së marketingut  (Wind & Mahajan, 2001).  Prandaj, bizneset duhet të kenë një gjë të qartë, që dinamikat e zhvillimit kërkojnë që ata të jenë shumë syhapur dhe sic thotë Urban “Bizneset duhet të vrapojnë, që të qëndrojnë në një vend”