Më 30 Shtator 2015, u themelua Trupi Këshillëdhënës në Fakultetin e Turizmit, Hotelerisë dhe Mjedisit, të Universitetit “Haxhi Zeka” në Pejë.
Qëllimi i këtij trupi është të krijoj lidhje bashkëpunimi në mes të Fakultetit të Turizmit,Hotelerisë dhe Mjedisit, dhe komunitetit të biznesit, ashtu që do të kontribuojnë në rritjen e cilësisë së arsimit dhe rritjen e punësueshmërisë të posadiplomuarëve duke siguruar që programet studimore janë në përputhje me nevojat e tregut të punës dhe duke siguruar që studentët kanë mundësi të aplikojnë njohuritë teorike në praktikë.
Anëtarët e trupit këshillëdhënës janë përfaqësues të shoqatave, agjencive dhe kompanive private në fushën e turizimit, hotelerisë dhe mjedisit në Kosovë siç janë: Hotel Dukagjini, Swiss Diamond Hotel, Magra Austria, VAS Tour Operator, Trentino con il Balcani, Regional Environmental Center, Divizioni për Hoteleri dhe Turizëm i MTI, Drejtorati për Zhvillim Ekonomik në Pejë, Qendra Rajonale për Trashëgimi Kulturore në Pejë, Shoqata e Turizmit Alternativ në Kosovë, dhe Grupi Era. Për më tepër, trupi këshillëdhënës përbëhet prej mysafirëve të nderit siç janë përfaqësuesit e projekteve të GIZ, Swiss Contact dhe USAID të cilët mund të kontribuojnë me ekspertizën e tyre.
Themelimi i këtij këshilli u mundësua përmes një bashkëpunimi të ngushtë me Rektorin e UHZ-së Prof. Naser Mrasori, Pro-rektorës Prof. Linda Grapci-Kotori, dhe Zyrtares për Komunikim Znj. Drenusha Gaxherri, dhe kompanisë M4Success L.L.C që ka qenë e angazhuar të përkrah themelimin e Trupave Këshillëdhënëse në 8 njësi akademike.
Ky projekt u përkrah nga projekti “Rritja e Punësimit të të Rinjëve” (EYE) dhe u financua nga Agjencioni Zvicërran për Zhvillim, me kërkesën e Universitetit “Haxhi Zeka” në Pejë.